និយមន័យរបស់ «របបផ្តាច់ការ»
ពាក្យថា «របបផ្តាច់ការ» មានន័យថា របប លទ្ធិ ការជឿ ឬការឲ្យតំលៃទៅលើអំណាចរបស់រដ្ឋ ឬមេដឹកនាំខ្ពស់ជាងសិទ្ធិសេរីភាពរបស់បុគ្គល ។ របបផ្តាច់ការ ជារបបដែលមិនទទួលស្គាល់លទ្ធិប្រជាធិបតេយ្យ មិនឲ្យតំលៃទៅលើការបោះឆ្នោតជ្រើសរើសអ្នកតំណាង មិនឲ្យតំលៃទៅលើការធានាសិទ្ធិសេរីភាព របស់ប្រជាជន មិនមានការប្រកួតប្រជែងដោយសម្លេងឆ្នោត ដែលមានពហុបក្ស ពោលគឺគណបក្សនានា (Multi-parties) ចូលរួម មានតែបក្សមួយដឹកនាំផ្តាច់ការដាច់ខាត គោរពកោតញញើតមេបក្ស ប្រធានបក្សមានអំណាចក្នុងការសម្រេចចិត្តដាច់ខាត នយោបាយរបស់បក្ស គឺជានយោបាយរបស់រដ្ឋ រិះគន់មិនបាន បិទសិទ្ធិការបញ្ចញយោបល់ (Thought Control) ប្រជាជនមិនមានសិទ្ធិសេរីភាពគ្រប់ផ្នែក រួមទាំងផ្នែកសេដ្ឋកិច្ចនិងផ្នែកយោបាយផងដែរ ។
និទានទាក់ទងនឹងរបបផ្តាច់ការ
អស់រយៈពេលជាច្រើនឆ្នាំ កន្លងទៅថ្មីៗ នេះ របបផ្តាច់ការមួយចំនួន ទាំងនៅក្នុងស្រុក និងនៅក្រៅ ស្រុក បានដួលរលំនៅពេលដែលប្រឈមមុខ ជាមួយនឹងប្រជាពលរដ្ឋ ដែលមានស្មារតីរឹងប៉ឹង និងការប្រមូលគ្នា ជាក្រុមៗ ។ របបផ្តាច់ការខ្លះ ហាក់ដូចជាមានភាពមាំមួន ដែលគ្មានអ្នកណាអាចប៉ះពាល់បាន ប៉ុន្តែទីបំផុតពុំមានលទ្ធភាព ប្រឈមមុខតទល់ជាមួយនឹងប្រជាពលរដ្ឋ ដែលសហការគ្នារើបម្រះ បដិសេធមិនធ្វើតាមបញ្ជា ទាំងផែ្នកនយោបាយ សេដ្ឋកិច្ច និងសង្គមកិច្ច ។
តាំងពីឆ្នាំ ១៩៨០ របបផ្តាច់ការមួយចំនួនបានដួលរលំ នៅចំពោះមុខការរើបម្រះអហិង្សារ បស់ប្រជាពលរដ្ឋ នៅប្រទេសអេស្តូនៀ (Estonia) ប្រទេសឡាតវៀ (Latvia) លីធូអានៀ (Lithuannia) ប៉ូឡូញ (Poland) អាឡឺមង់ខាងកើត (East Germany) ឆេកូស្លូវាគី (Czechoslovakia) ស្លូវេនៀ (Slovenia) ម៉ាដាហ្គាស្កា (Madagascar) ម៉ាលី (Mali) បូលីវៀ (Bolivia) និងហ្វីលីពីន (Philippines) ។ ការប្រឆាំងអហិង្សា បានជំរុញឲ្យមានចលនា ទៅរកលទ្ធិប្រជាធិបតេយ្យ នៅក្នុងប្រទេសនេប៉ាល់ (Nepal) សាំបៀ (Zambia) កូរ៉េចខាត្បូង (South Korea) ឈីលី (Chile) អាហ្សង់ទីន (Argentina) ហៃទី (Haiti) ប្រេស៊ីល (Brazil) អ៊ូរូហ្គាយ (Uruguay) ម៉ាលាវី (Malawi) ប៊ុលហ្គារៀ (Bulgaria) ហុងគ្រី (Hungary) ស្សេរ៉េ (Zaire) នីស្សេរី (Nigeria) និងតំបន់ផ្សេងៗ ទៀត នៃសហភាពសូវៀត (ដើរតួយ៉ាងសំខាន់ក្នុងការធ្វើឲ្យពួកជ្រុលនិយម បរាជ័យក្នុងការប៉ុនប៉ង ធ្វើរដ្ឋប្រហារ នៅខែសីហា ១៩៩១) ។