លោក កុយ គួង អ្នកនំាពាក្យក្រសួងការបរទេសកម្ពុជា
មេដឹកនាំគណបក្សនយោបាយនៅកម្ពុជានឹងសរសេរលិខិតអបអរសាទរជ័យជំនៈរបស់លោក François Hollandeមកពីគណបក្សសង្គមនិយមដែលបានជាប់ឆ្នោតធ្វើជាប្រធានាធិបតីថ្មីរបស់ប្រទេសបារាំង។ អ្នកនាំពាក្យក្រសួងការបទេសកម្ពុជាលោកកុយ គួងបានប្រាប់អោយដឹងថា រដ្ឋាភិបាលកម្ពុជានឹងផ្ញើលិខិតអបអរសាទរនេះទៅលោកប្រធានាធិបតីថ្មីរបស់បារាំង។ ជាមួយគ្នានេះ លោកជាម យៀបតំណាងរាស្ត្រនិងជាសមាជិកជាន់ខ្ពស់របស់គណបក្សប្រជាជនកម្ពុជាកំពុងកាន់អំណាចសព្វថ្ងៃនេះ ក៏បានបញ្ជាក់បង្ហាញក្តីសង្ឃឹមថារដ្ឋាភិបាលថ្មីរបស់បារាំងដែលដឹកនាំដោយគណបក្សសង្គមនិយមនេះ នឹងបន្តវេនពីមេដឹកនាំបារាំងមុនៗក្នុងការពង្រឹងនិងរឹតចំណងសាមគ្គីភាព និងសហប្រតិបត្តិការគ្រប់វិស័យរវាងប្រទេសមិត្តភក្តិចាស់ទាំងពីរតទៅមុខទៀត។ លោក ជាម យៀបបង្ហាញក្តីសង្ឃឹមនេះ ដោយសារតែកម្ពុជា គឺជាសមាជិកមួយនៃប្រទេសនិយាយភាសាបារាំង។
គណបក្សនរោត្តម រណឬទ្ធិឯណោះវិញ តាមរយៈអ្នកនាំពាក្យរបស់ខ្លួន បានអោយដឹងថា ព្រះអង្គម្ចាស់នរោត្តម រណឬទ្ធិក៏នឹងផ្ញើលិខិតសាទរទៅលោក François Hollandeដែរ។ អ្នកនាំពាក្យនេះគឺលោកប៉ែន សង្ហាបានបញ្ជាក់ថា ព្រះអង្គម្ចាស់នរោត្តម រណឬទ្ធិមានទំនាក់ទំនងល្អជាមួយថ្នាក់ដឹកនាំគណបក្សសង្គមនិយមរបស់បារាំងនេះក្នុងដើមទសវត្សរ៍៩០។ នៅពេលនោះ ជាពេលដែលបារាំងកំពុងបំពេញបេសកម្មស្វែងរកសន្តិភាពអោយកម្ពុជា។
មកនិយាយអំពីគណបក្សប្រឆាំងវិញម្តង។ ប្រធានស្តីទីរបស់គណបក្សសម រង្ស៊ី គឺលោកគង់ គាំ និងប្រធានគណបក្សសិទ្ធិមនុស្សគឺលោកកឹម សុខា អ្នកនយោបាយទាំងពីរបានអត្ថាធិប្បាយដូចគ្នាថា ជ័យជំនៈរបស់លោក François Hollande គឺជាសារមួយប្រាប់ថា នៅក្នុងប្រទេសប្រជាធិបតេយ្យប្រជាពលរដ្ឋត្រូវការផ្លាស់ប្តូរមេដឹកនាំ។
លោកគង់ គាំពន្យល់បន្តថា បើទោះជា លោកអតីតប្រធានាធិបតីលោកNicolas Sarkozy មានគុណសម្បត្តិច្រើននៅក្នុងការដឹកនាំប្រទេសបារាំងក៏ដោយ ក៏ប៉ុន្តែចំនុចខ្វះខាតខ្លះគឺជាមូលហេតុដែលប្រជាពលរដ្ឋបារាំងត្រូវផ្លាស់ប្តូរមេដឹកនាំរបស់ខ្លួនចេញ។ ប្រធានស្តីទីគណបក្ស សម រង្ស៊ីអំពាវនាវអោយលោក François Hollande បន្តយកចិត្តទុកដាក់ចំពោះការអនុវត្តន៍កិច្ចព្រមព្រៀងទីក្រុងប៉ារីសនៅកម្ពុជាដែលទាក់ទងនឹងបញ្ហាប្រជាធិបតេយ្យ សិទ្ធិមនុស្ស និងបូរណភាពទឹកដី។
សម្រាប់លោកកឹម សុខាវិញ គណបក្សសង្គមនិយមបារាំងច្រើនគិតគូរយកចិត្តទុកដាក់ចំពោះប្រទេសកំពុងអភិវឌ្ឍន៍។ ដូច្នេះលោកនឹងសរសេរលិខិតអបអរសាទរមួយ និងស្នើសុំអោយលោក François Hollandeតាមដានបញ្ហាក្រីក្រ និងបញ្ហាការគោរពសិទ្ធិកម្មករនៅកម្ពុជា៕